Era pandèmia e es repetidi confinaments an dirigit era uelhada d’educadors e professionaus dera salut mentau a ua problematica que dejà existie e que s’a agudizat en contèxte dera COVID; era fauta de contacte dera nòsta mainadèra damb era Natura, er amendriment deth jòc motor e simbolic liure, er abús en usatge des pantalhes, eth sendentarisme e era manca d’exposicion ar aire liure e ath Solei, inclús en zònes ruraus, damb es conseqüents efèctes sus era sua salut fisica e mentau.
Diuèrses aportacions des dera neurosciéncia defenen era importància dera Natura entath desvolopament adequat dera infància e remèrquen es beneficis de promòir eth contacte damb era Natura en camp educatiu; augmente es nivèus de creativitat e de resolocion de problèmes, promò eth jòc sociau e coooperatiu e es relacions sociaus, milhore es abilitats cognitives e era concentracion, aumente eth rendement academic, amendrís es simptòmes des transtorns per deficit d’atencion, damb iperactivitat o sense, incremente era activitat fisica, promò ua alimentacion saludabla, milhore eth desvolopament deth sistèma visuau e redusís es nivèus d’estrès. (Marta PorteroTresserra, 2022)
Des d’aguesta perspectiva, des de diferents disciplines; era pedagogia, era psicologia, era educacion ambientau, era arquitectura, era agronomia… e entitats; AMPES, CRP, Ajuntaments, Escòles, Collegis d’Arquitectes … , s’a remercat eth besonh de replantejar er ús que se hè des espacis escolars, en especiau deth pati.
Cada viatge son mès es escòles qu’an decidit iniciar aguest camin de naturalizar es patis des d’ua perspectiva mès sostenibla e saludabla entath desvolopament dera mainadèra. Damb aguesta finalitat vos auferim aguest amàs de recorsi que vos pòden ajudar a encetar aguest camin.
