Era Diputació de Lleida amassa damb era Federació Catalana d’Esports de Persones amb Discapacitat Física (FCEDF) desvolupen eth programa “Esport adaptat a l’escola”, mejançant eth qu’es pretén qu’er alumnat sapie qu’er espòrt pòt èster inclusiu entà toti, sigue quina sigue era diversitat funcionau dera persona.
Laguens d’aguest encastre, dijaus 9 d’abriu se celebrèc ua jornada en pavalhon poliesportiu de Salardú entar alumnat de cicle superior dera ZER, a on es mainatges e mainades poderen practicar diuèrsi espòrts paralimpics.
Era organizacion estec a cargue dera Federació Catalana d’Esport de Persones amb Discapacitat Física (FCEDF) en coordinacion damb era direccion dera ZER e era fisioterapèuta der EAP Val d’Aran-Alta Ribagorça e era collaboracion der Ajuntament deth Naut Aran.
Abans dera jornada practica es realizèc ua session teorica en cada centre damb era finalitat de crear consciéncia e fomentar tant era sensibilizacion cap ar espòrt adaptat coma era acceptacion dera diversitat e era singularitat des persones.
Ena jornada deth 9 d’abriu er alumnat practiquèc 4 modalitats esportives, en situacion reau de jòc, damb eth corresponent materiau esportiu especific.
Damb aguesta jornada auem volut sensibilizar sus era normalitat e era viabilitat der espòrt adaptat, remèrcar eth papèr der espòrt coma eish vertebrador dera inclusion, es dificultats e era capacitat de superacion des esportistes damb discapacitat, trebalhar era autoacceptacion deth pròpi còs e dera rèsta der alumnat atau coma era diversitat des persones e des capacitats. Arregraïm era collaboracion dera Federació Catalana d’Esports de Persones amb Discapacitat Física (FCEDF) e der Ajuntament deth Naut Aran pera cession des installacions entà realizar era activitat.
Entà mès informacion:
