Er Archiu Generau d’Aran mos hè a arribar informacions sus eth nau espaci ena web der Archiu: “Exposicions Virtuaus”
Quate exposicions de produccion pròpria via Calaix
Tres ath torn deth Bicentenari dera Casa deth Senhor
Quaderns de dibuix de Maurice Gourdon
Coneish es diboishi que Gourdon hè des sues excursions de caractèr scientific coma geològ e arqueològ e des sòns viatges per Euròpa (Val d’Aran, Catalonha, Aragon, Andorra, França, Itàlia, Corsega, Alemanha, Soïssa, Croàcia, Bosnia e Hercegovina e Noruega) entre 1874 e 1922.
Es autes tres exposicions son productes virtuaus elaboradi ath torn deth Bicentenari dera Casa deth Senhor d’Arròs (1820-2020). Er edifici d’estil neoclassic ei era sedença der Archiu.
Era Casa deth Senhor d’Arròs 1820-2020
Coneish era istòria des familhes Subirà e Ademà des deth sègle XVI enquiath XX.
Era union de dus familhes es Subirà deth Senhor d’Arròs e es Ademà des de Tròi d’Arró la vedèc néisher en un entorn de poder e riquesa. Non ère casualitat aguesta union. Es dues familhes, segurament emparentades, auien compartit era alternança der ofici de baile dera Bailia Generau des terçons de Lairissa e de Bossòst. Un ofici que passaue de pairs a hilhs.
Quan ena familha Subirà d’Arròs era ereua ei ua hemna, Maria Antònia Subirà Ademà, non estone que se maride damb un hilh des Ademà d’Arró.
E des d’Arró arribe er òme, Francisco Ademà Subirà, que transformarà er auviatge des Subirà e eth paisatge urban d’Arròs. Mès eth madeish contribuirà ara decadéncia e desaparicion d’aguest patrimòni en miei des istòries e des legendes.
Ben lèu vos informaram dera publicacion digitau d’un libret sus era istòria dera Casa deth Senhor en sòn Bicentenari
Arquitectura e decoracion interiora neoclassica ena Casa deth Senhor
Coneish er estil Neoclassic a trauès der edifici dera Casa deth Senhor.
Ena Casa deth Senhor d’Arròs, datada en 1820, se pòden veir fòrça des caracteristiques arquitectoniques e decoratiues d’aguest nau estil, qu’ei de mòda en moment deth sòn projècte e bastiment.
“Es Ribes deth Bosfòr. Ua panoramica de Joseph Dufour de 1812 ena Casa deth Senhor”,
Mòstra es papèrs “pintats” plaçadi en ua des petites crambes dera prumèra planta dera casa, segurament abilitada coma petit salonet. Era panoramica ère ua decoracion pròpria des salons des familhes burgeses de França.
Ena Casa deth Senhor, era familha Ademà Subirà place ua pèça originau de Joseph Dufour, datada ath torn de 1812, e coneishuda com “Es Ribes deth Bosfòr”. En era se pòt veir ua imatge idealizada des dues ribes dera ciutat turca d’Instanbul.
Es òbres de reabilitacion der edifici dera Casa deth Senhor en 1995 la hèc despareisher. Un trabalh d’investigacion realizat des der Archiu l’a volut méter en valor e dar a coneisher.
Coneish er espaci “Exposicions Virtuaus” der Archiu Generau d’Aran
