 |
 |
Aprofitam aguesta data entà rebrembar-vos bères publicacions de poètes aranesi…
- ER OS en BESTIAUUU!, AMÀS POETIC DE BÈSTIES, BESTIÒTES E BESTIESES de Xavi Gutiérrez Riu e illustracions de Ricard Novell, edicion Conselh Generau d’Aran. En aguesta publicacion poiratz trapar diuèrses poesies sus fauna pròpia dera Val d’Aran, e tanben un shinhau d’umor!
- TÀ MÈLBA de Ninfa Carabias Escost, en Istòries, condes e poèmes dera Colleccion Garona. Pagès editors. En aguesta colleccion poiratz trapar es òbres premiades en Prèmi Mn.Condò, pendent quauqui ans, ena seccion adults e tanben ena seccion infantil.
ER OSEth Quin animau, aguest pelut: qu’ei gròs e ròi, un cabarniàs, un aurelhut e camicuert, un gran timid tostemp pauruc que’s grate eth peu -que l’a tot doç-. Qu’ei coacuert e vistaflac, que i sent e flaire de ben luenh mès se i ve pòc e viu solet, un bon gormand vegetarian que minge mores e jordons, aurans, ahragues e auajons,
|
e tanben mèu, se pòt, deth pòt o deth brinhon; qu’ei caminaire e vagamond,
eth sentiment de libertat de poder córrer tot eth mont, e de posà’s -quan ei tot gras-; qu’a de besonh tranquillitat, qu’ei per aquerò que domís plan. Xavi Gutiérrez Riu |
TÀ MÈLBAEn un país de nòm que non posqui rebrembar. En un país plen de colors on er arc de St. Martin ère pònt enter nautes montanhes, coronades d’esteles heiredes e ludentes. En un país de grani auets, de longues ombres que susvelhauen totes es frontères sense espases ne fusilhs. En aqueth pòble arribèc Mèlba. Mèlba ère grana, fòrta, sauvatja e confiada. Se passejaue pes bòsqui, caushigaue es praderies, es divertie tamb es petites flors que perlauen es prats ath començament der estiu. Caminaue erosa pes cantères der arriu en tot veir com es aigües dançauen aubades en tot sautar de pèira en pèira… Ninfa Carabias Escost |
|---|
