Eth passat 12 de noveme, eth Conselh Generau d’Aran presentèc era naua campanha de normalizacion e promocion dera lengua:-“Ací ne didem”
Naua campanha deth Conselh Generau d’Aran entà fomentar er usatge der aranés en dia a dia. Ua campanha que non sonque vò implicar ara gent joena, senon arribar a totes es generacions e, ath delà, ad aqueri que visiten esporadicaments casa nòsta.
“En aranés ne didem,…” -qu’ei eth nòm d’aguesta campanha- hè part dera naua marca En aranés, òc, que vò impulsar accions pera lengua enes pròplèus 10 ans damb un calendari d’accions contunhades. “Ua campanha qu’ei viua, tà anar-se adaptant e evolucionant e sajar de revertir eth retrocès que viu era nòsta lengua”, afirme era sindica d’Aran, Maria Vergés.
A diferéncia de campanhes anteriores, dirigides principauments as parlants joeni, en aguesta escadença se vò implicar un espèctre mès ample dera poblacion e, tanben, hèr a conéisher era lengua as visitants.
Era campanha serà presenta enes ràdios, es hilats sociaus e tanben en format fisic, ath transpòrt public e en format de calendari, que se repartirà per totes es cases dera Val.
Aguesta campanha se poderà enténer tanben enes ràdios deth territòri e veder-se format fisic en diuèrsi punts dera Val d’Aran, a coma objectiu dar a conéisher un vocabulari basic en aranés e apropar era lengua ad aqueres persones que non la coneishen encara. Atau, se presenten paraules coma audèth, huec, hièstra, hemna o nhèu, entre d’autes.
Entà qu’era poblacion dera Val d’Aran pogue conéisher milhor aguesta campanha, eth Conselh Generau d’Aran harà arribar as domicilis deth territòri un petit escrit en tot presentar-la, acompanhat d’un calendari que compdarà damb dotze mots relacionadi damb es mesi der an corresponents e un adesiu dera marca En aranés, òc.
“Ací ne didem,….”era naua campanha entà fomentar er usatge der aranés:
https://www.3cat.cat/3catinfo/aci-ne-didem-era-naua-campanha-enta-fomentar-er-usatge-der-aranes/noticia/3380336/
