Era Deputacion de Lhèida trebalhe conjuntament damb era Federacion Catalana d’Espòrts de Persones damb Discapacitat Fisica (FCEDF) damb era fin de crear consciéncia e fomentar tant era sensibilizacion respècte er espòrt adaptat coma era acceptacion dera diversitat e era singularitat des persones.
Laguens d’aguest encastre, era accion principau que s’amie a tèrme ei eth programa “Espòrt adaptat ara escòla”, mejançant eth qué se vò qu’er alumnat sàpie qu’er espòrt pòt èster inclusiu entà toti, sigue quina sigue era diversitat foncionau dera persona. Er objectiu ei remercar eth papèr der espòrt coma èish vertebrador dera inclusion.
Aguesta propòsta ei adreçada principauments as escòles ZER deth territòri de Lhèida. Enguan se realizarà ua Jornada damb er alumnat de cicle superior dera ZER dera Val d’Aran, organizada pera Federacion Catalana d’Espòrt de Persones damb Discapacitat Fisica (FCEDF) en coordinacion damb era direccion dera ZER e era fisioterapeuta der EAP Val d’Aran-Alta Ribagòrça, e damb era collaboracion der Ajuntament deth Naut Aran.
🗓️ 09 d’abriu
📍 Pavalhon poliesportiu – SALARDÚ
⌚ 09:30 – 11:30 ores
Es objectius d’aguest programa son:
- Hèr a conéisher es diuèrses modalitats esportives adaptades, diferents materiaus especifics e diferéncies reglamentàries o organizatives respècte es modalitats esportives convencionaus des madeishi espòrts.
- Practicar diuèrses modalitats esportives, en situacion reau de jòc, damb eth corresponent materiau esportiu especific.
- Sensibilizar sus era normalitat e era viabilitat der espòrt adaptat, e remercar es dificultats e era capacitat de superacion des esportistes damb discapacitat.
- Trebalhar era autoacceptacion deth pròpi còs e eth dera rèsta der alumnat atau coma era diuersitat des persones e des capacitats.
- Remercar eth papèr der espòrt coma èish vertebrador dera inclusion.
