Com dejà sabetz eth passat 5 de junhsèga era UNESCO reconeishe ara Val d’Aran coma Resèrva dera Biosfèra e aguest dissabte, 9 de noveme, se celebrèc er acte d’autrejament d’aguest certificat, acte en què era paraula sostenibilitat estec era protagonista.
Es Resèrves dera Biosfèra son, atau e coma definís era UNESCO, “endrets d’aprenedissatge tath desvolopament sostenible”. Son lòcs a on se sage d’aplicar enfocaments interdisciplinaris que permeten compréner e gestionar es cambis e es interaccions que se produssissen entre es sistèmes sociaus e ecologics, entre es que se trapen era prevencion de conflictes e era gestion dera biodiversitat. Son espacis qu’apòrten solucions locaus a problèmes mondiaus. Es Resèrves dera Biosfèra prepausen diuèrses solucions entà conciliar era conservacion dera biodiversitat damb un usatge sostenible. Non son en cap cas figures de proteccion ambientau ne tanpòc un label toristic.
Era candidatura d’Aran coma Resèrva dera Biosfèra s’a postulat coma un esturment entà preservar e recuperar es activitats tradicionaus en tot prebotjar politiques de despoblament e transicion a un modèl rurau mès resilient, en tot veicular era armonizacion d’un desvolopament economic sostenible damb era gestion e preservacion des valors culturaus e naturaus.
Aguesta candidatura encaishe donc damb es tres èishi principaus qu’era UNESCO fixe tad aguest reconeishement: era conservacion dera diversitat biologica e culturau, eth desvolopament economic sostenible a nivèu socioculturau e ambientau, e eth supòrt logistic qu’ampare eth desvolopament a trauès dera investigacion, eth seguiment, era educacion e era formacion.
Atau madeish, aguesta prepausa a presentat un equilibri entre qüestions ambientaus, socioeconomiques e culturaus, en tot préner ua importància relheuant era preservacion dera lengua, cultura e patrimòni d’Aran, elements essenciaus dera singularitat dera Val d’Aran.
